Rachadh céim dheonach Eorpach chun tairbhe do mhic léinn agus do phobal an ardoideachais trí bhorradh a chur faoin tsoghluaisteacht foghlama laistigh den Aontas agus trí scileanna idirdhisciplíneacha na mac léinn a fheabhsú. Chuideodh sé le freastal ar éileamh mhargadh an tsaothair agus le céimithe a dhéanamh níos tarraingtí d'fhostóirí amach anseo agus, ag an am céanna, mic léinn a mhealladh ó gach cearn den domhan agus borradh a chur faoi iomaíochas na hEorpa.
Téann na trí thionscnamh i ngleic leis na bacainní dlí agus riaracháin atá ann d'ollscoileanna comhpháirtíochta a chuireann cláir chéime chomhpháirteacha iomaíocha ar bun ar leibhéal Baitsiléara, Máistreachta nó Dochtúireachta. Cuireann na tograí le neamhspleáchas institiúideach agus saoirse acadúil na n-ollscoileanna. Urramaíonn siad inniúlachtaí na mBallstát agus na rialtas réigiúnach go hiomlán i réimse an ardoideachais.
Is éard atá i bpacáiste an lae inniu Teachtaireacht maidir le treoirphlean le haghaidh céim Eorpach agus dhá thogra le haghaidh moltaí ón gComhairle chun tacú le hearnáil an ardoideachais: ceann amháin chun próisis dearbhaithe cáilíochta agus aitheantas uathoibríoch cáilíochtaí san ardoideachas a fheabhsú, agus an ceann eile chun gairmeacha acadúla a dhéanamh níos tarraingtí agus níos inbhuanaithe.
Is bunchloch tógála dár ndóigh bheatha Eorpach é an t-oideachas agus is gealltanas é dár nglún óg. Cuireann ár n-ollscoileanna scileanna straitéiseacha ar fáil do chéimithe dá dtodhchaí agus feidhmíonn siad mar rabhcháin de bhranda Eorpach barr feabhais acadúil. Céim Eorpach is ea an chéad chéim eile agus cuirfidh sí ar chumas ár n-ollscoileanna oibriú le chéile, ar mhaithe le mic léinn, múinteoirí, fostóirí agus iomaíochas na hEorpa.
Margaritis Schinas, an Leas-Uachtarán um Ár nDóigh Bheatha Eorpach a chur chun cinn
Treoirphlean do chéim Eorpach
Leis an treoirphlean do chéim Eorpach a cuireadh i láthair inniu, réitítear an bealach do chineál nua cláir chomhpháirtigh, a chuirfear ar fáil ar bhonn deonach ar an leibhéal náisiúnta, réigiúnach nó institiúideach, agus atá bunaithe ar shraith choiteann critéar arna gcomhaontú ar an leibhéal Eorpach.
Le céim Eorpach den sórt sin, laghdófaí an rómhaorlathas agus chuirfí ar chumas institiúidí ardoideachais ó thíortha éagsúla comhoibriú gan uaim thar theorainneacha agus cláir chomhpháirteacha a chur ar bun.
Moltar sa Teachtaireacht bealach nithiúil comhair idir Ballstáit an Aontais agus earnáil an ardoideachais chun céim Eorpach a chruthú a aithnítear go huathoibríoch ar fud an Aontais. I bhfianaise éagsúlacht na gcóras ardoideachais Eorpach ar fud na hEorpa, molann an Coimisiún cur chuige céimnitheach do na Ballstáit i dtreo céim Eorpach, ina mbeadh dhá phointe iontrála féideartha:
- Lipéad Eorpach ullmhúcháin: sholáthródh lipéad brandáil láidir Eorpach. Thabharfaí é do chláir chéime chomhpháirteacha a chomhlíonann na critéir Eorpacha atá beartaithe: faigheann mic léinn teastas na céime Eorpaí mar aon lena gcomhchéim.
- Céim Eorpach: bheadh an cineál nua cáilíochtaseo bunaithe ar na critéir chomhchoiteanna agus bheadh sé fréamhaithe sa reachtaíocht náisiúnta. Bhronnfadh roinnt ollscoileanna as tíortha éagsúla é go comhpháirteach nó b'fhéidir go mbronnfadh eintiteas dlíthiúil Eorpach é arna bhunú ag na hollscoileanna sin: faigheann na daltaí ‘Céim Eorpach' a aithnítear go huathoibríoch.
Déanfaidh an Coimisiún na Ballstáit a éascú agus tacóidh sé leis an obair i dtreo na céime Eorpaí trí roinnt gníomhaíochtaí nithiúla, lena n-áirítear saotharlann beartais don chéim Eorpach a fhaigheann tacaíocht ó chlár Erasmus+, a bhunófar in 2025, agus é mar aidhm aige na Ballstáit agus an pobal ardoideachais a rannpháirtiú chun treoirlínte a fhorbairt i dtreo céim Eorpach.
In 2025, tá sé beartaithe ag an gCoimisiún ‘tionscadail chonairí na céime Eorpaí' a sheoladh faoi chuimsiú chlár Erasmus+ chun dreasachtaí airgeadais a chur ar fáil do na Ballstáit, mar aon lena ngníomhaireachtaí creidiúnaithe agus dearbhaithe cáilíochta, ollscoileanna, mic léinn, comhpháirtithe eacnamaíocha agus sóisialta, chun dul i dtreo céim Eorpach.
Dearbhú cáilíochta níos simplí agus níos fearr agus aitheantas uathoibríoch do chéimeanna ollscoile
Leis an togra ón gCoimisiún le haghaidh Moladh ón gComhairle maidir le córas Eorpach dearbhaithe cáilíochta agus aitheantais san ardoideachas, iarrtar ar na Ballstáit agus ar institiúidí ardoideachais a bpróisis agus a gcleachtais dearbhaithe cáilíochta a shimpliú agus a fheabhsú. Is coinníollacha riachtanacha iad sin don chuntasacht agus don mhuinín — agus chun feidhmíocht na n-ollscoileanna a fheabhsú. Iarrtar ar na Ballstáit bearta a dhéanamh chun go mbeidh institiúidí ardoideachais in ann na cláir a thairgtear a oiriúnú ar bhealach níos tapa do riachtanais na sochaí.
Leis an Moladh seo, formhuineofaí tairiscintí nuálacha oideolaíocha agus d'áiritheofaí gur féidir le hinstitiúidí ardoideachais cláir thrasnáisiúnta a chruthú a dhearbhófar ar ardchaighdeán agus a aithnítear go huathoibríoch ar fud an Aontais. Beidh an chéim Eorpach ag brath ar dhearbhú cáilíochta láidir agus ar aitheantas uathoibríoch.
Aitheantas a thabhairt do róil éagsúla na foirne acadúla go cothrom
Is é is aidhm don Mholadh ón gComhairle atá beartaithe maidir le gairmeacha tarraingteacha inbhuanaithe san ardoideachas an t-aitheantas agus an luach saothair atá tuillte acu a thabhairt do bhaill foirne a bhfuil baint acu le hobair trasteorann san oideachas agus i modhanna nuálacha teagaisc. Déantar moltaí ann chun a áirithiú go dtabharfaidh córais ardoideachais náisiúnta aghaidh ar an aitheantas míchothrom ar na róil éagsúla a ghlacann baill foirne sa bhreis ar thaighde, amhail teagasc agus infheistíocht a dhéanamh i bpríomhshruthú na forbartha inbhuanaithe. Spreagann sé na Ballstáit freisin chun gníomhaíochtaí oideachais trasnáisiúnta a chur chun cinn.
Na chéad chéimeanna eile
Pléifear an pacáiste le Comhairle an Aontais Eorpaigh agus le príomhpháirtithe leasmhara san ardoideachas sna míonna amach romhainn. Iarrann an Coimisiún ar an gComhairle, ar na Ballstáit, ar ollscoileanna, ar mhic léinn, agus ar chomhpháirtithe eacnamaíocha agus sóisialta oibriú go comhpháirteach chun an chéim Eorpach a bhaint amach.
Cúlra
I mí Mheán Fómhair 2020, sainaithníodh sa Teachtaireacht ón gCoimisiún maidir leis an Limistéar Eorpach Oideachais a bhaint amach faoi 2025 an gá atá le cláir chomhpháirteacha céime a éascú le haghaidh comhghuaillíochtaí ardoideachais. D'fhormhuinigh an Chomhairle é an bhliain dár gcionn.
D'fhógair an tUachtarán von der Leyen pacáiste an lae inniu ina haitheasc ar Staid an Aontais 2023 agus is cuid de Chlár Oibre 2024 an Choimisiúin é.
Tógann an treoirphlean le haghaidh céim Eorpach ar shé thionscadal phíolótacha Erasmus+ a bhfuil níos mó ná 140 institiúid ardoideachais as gach cearn den Aontas páirteach iontu.
Tuilleadh eolais
Sonraí
- Dáta foilsithe
- 27 Márta 2024
- Údar
- An Ionadaíocht in Éirinn