ÉIRE, AN BHULGÁIR, agus AN PHORTAINGÉIL tarchurtha ag an gCoimisiún chuig Cúirt Bhreithiúnais an Aontais Eorpaigh toisc nár chomhlíon siad an Rialachán maidir le hÁbhar Sceimhlitheoireachta ar Líne

Chinn an Coimisiún inniu Éire (INFR(2022)2121), an Bhulgáir (INFR(2022)2113), agus an Phortaingéil (INFR(2022)2129)a tharchur chuig Cúirt Bhreithiúnais an Aontais Eorpaigh toisc nár chomhlíon siad oibleagáidí áirithe ón Rialachán maidir le scaipeadh ábhair sceimhlitheoireachta ar líne (‘Rialachán TCO', Rialachán (AE) 2021/784). 

Ceanglaítear le Rialachán TCO, a tháinig i bhfeidhm an 7 Meitheamh 2022, go ndéanfaidh ardáin ar líne ábhar sceimhlitheoireachta san Aontas a bhaint anuas laistigh d'uair an chloig tar éis ordú baint anuas arna eisiúint ag údaráis na mBallstát a fháil. Cuidíonn sé sin le deireadh a chur le scaipeadh idé-eolaíochtaí antoisceacha ar líne – rud atá ríthábhachtach chun ionsaithe a chosc agus aghaidh a thabhairt ar radacú – agus cearta bunúsacha á gcosaint. 

Measann an Coimisiún nár chomhlíon Éire, an Bhulgáir, ná an Phortaingéil ceann amháin nó níos mó de na hoibleagáidí faoi Rialachán TCO. Cuimsítear leis sin an ceanglas an t-údarás nó na húdaráis a ainmniú a bheidh freagrach as an Rialachán a fhorfheidhmiú agus comhlíonadh a chinntiú, agus fógra a thabhairt don Choimisiún faoi na húdaráis sin; pointe teagmhála poiblí a bhunú chun iarrataí ar shoiléiriú agus aiseolas i ndáil le horduithe baint anuas a láimhseáil; agus na rialacha agus na bearta a leagan síos maidir le pionóis i gcás nach gcomhlíonann soláthraithe seirbhísí óstála a n-oibleagáidí dlíthiúla. Dá bhrí sin, tá Éire, an Bhulgáir, agus an Phortaingéil á dtarchur ag an gCoimisiún chuig Cúirt Bhreithiúnais an Aontais Eorpaigh.  

Tuilleadh eolais sa phreasráiteas.